《國歌法》咁玩法？坐輪椅阿婆聽到都要彈起身肅立
引用:
《逃犯條例》修訂令到立法會風起雲湧，大家亦唔好忘記，政府同時喺立法會硬推緊《國歌法》。由「紅二代」霍啟剛出任執行主席嘅香港各界青少年活動委員會，真係政府嘅「好幫手」，近日整咗套《義勇軍進行曲》「快閃」音樂短片，明顯係為政府造勢宣傳。
唔好睇少呢條片，好多知名「紅人」㗎，包括講過自己如果要買電視機一定會買日本製、因為「中國的會爆炸」嘅成龍，同埋曾經支持成龍做政協嘅譚詠麟，其他如鄺美雲等人大代表，當然都要現身唱國歌，齊齊向阿爺展示一片丹心，蘭桂坊之父盛智文都有用中文唱幾句國歌。但更搶鏡嘅，可能係片中一位坐住輪椅嘅婆婆，因為當佢聽到國歌時，都要突然撐拐杖，彈起身肅立。嘩，老弱傷殘睇完片，會唔會好驚聽到國歌？
其實一向關心殘疾人士權益嘅工黨議員張超雄早前講過，《國歌法》條文中要求出席奏唱國歌場合人士要「肅立」不合理，因有啲人可能因身體情況，無法「肅立」，認為有關條文帶有歧視成份。政制及內地事務局局長聶德權當時稱，「肅立」內容只係指引性條文，如果有啲人因為某啲身體狀況做唔到，政府完全可以理解，唔會因此懲罰有關人士。所以呢，他日國歌法若然通過咗，因為身體有問題而要坐輪椅嘅人，按聶德權所講，其實唔使彈起身肅立，唔知政府覺得呢條宣傳片，到底係「幫到忙」抑或「幫倒忙」呢？
|
O係ICU入面部電視播O既話點算？
如果HAWKING仲在生又咁啱O係香港，佢應該會俾班慈母拖入冊吧？
