全能戰力普巴醒覺 全靠費查特訓
曼聯近期表現突出，法國中場保羅普巴嘅「醒覺」絕對係主要原因，呢位世界冠軍球員向來被指踢波懶懶閒，但近期唔單止施展佢嘅進攻天賦，就連防守都非常出色，真正成為中場嘅「全能戰士」，而呢次轉變有個關鍵因素──費查回歸。
蘇格蘭中場費查被視為曼聯近年其中一位最實而不華嘅中場，佢早前獲蘇斯克查邀請加入教練團，據報獲得球員一致歡迎，而費查其中一個重點任務，就係改善球隊防守能力，當中又以保羅普巴嘅改造效果最為明顯。
自費查重返曼聯任教練後，「紅魔鬼」踢過5場比賽，保羅普巴一共錄得26次重奪控球權、203次傳送同6次搶截，3項數字都係曼聯隊中之冠，仲有7次正面搶截成功，只係僅次於費特洛迪古斯(8次)排第2位，可見保羅普巴嘅防守表現係得到極大提升。
