國米馬體會力搶!曼聯死攬中場廢柴
睇番曼聯陣容,最弱肯定係中場線,但本季已被貶為後備嘅尼曼查馬迪,依然有勁旅吼到實。國際米蘭領隊干地,似乎對曼聯球員情有獨鍾,繼簽入盧卡古、阿歷斯山齊士,並斟緊艾舒利楊格後,亦都希望於1月轉會窗引入馬迪;另外馬體會亦對馬迪有興趣,不過曼聯已全部拒絕,馬迪起碼會留到季尾。
馬迪於蘇斯克查麾下,重要性已大大減低,本季正選位置被麥湯米尼搶走,而其出場次序,亦排於安達斯彭利拿及費特洛迪古斯之後,但呢名31歲塞爾維亞國腳一樣仲有市場,國米希望除對巴塞中場維度爾有意外,亦希望簽入馬迪增強中場實力,而馬體會更想用赫達靴里拉加現金提出收購。
但因為麥湯米尼受傷,曼聯唔夠防中替換,已經表明唔會出售馬迪,就睇吓馬迪之後會唔會用表現回饋蘇帥嘅信任。