[王小虎]

其實可以對比翻Dark Knight Rises的槍擊事件，兩者都係有精神病（現實的犯人雖然冇因為有病而減刑，但都係有病）。兩者都有寫記事簿習慣，而且亦都喺記事簿睇得出有想犯案的傾向。

所以我覺得導演係有心地去回應槍擊事件，不過佢用的角度唔係好多人可以接受，甚至槍擊事件死者的家屬都出來評擊，話佢以同情的角度去寫Joker呢個人。可能我啱啱睇完"我們與惡的距離"，會有唔同觀點，精神病如果冇人注視關心，冇資源去幫佢哋，歷史會不斷重覆，無差別殺人事件會再出現。並唔係一味鬧一味寫衰佢，以後就會神奇地冇晒精神病人，冇晒不幸的意外。我哋可以做的係有好的機制投放資源，喺意外發生前盡量避免。你諗吓其實如果佢一路有藥食，冇人比支槍佢（槍管），出事的機會率低好多。

當然香港普通人冇槍，好似同我哋好唔關事（當然都會有，但個程度相較下低）。不過如果用同等的心態，要一個好的制度去教育/訓導同監管/審判有槍的人士，要佢哋無論係心理質素、道德水平、人權法律的知識都提高到應有的水準，唔係吓吓話用"你交幾多錢稅"去衡量別人，用職業去批判人的社會"地位"（其實無論地位高低都應該擁有基本人權），無視法律濫用暴力，知法犯法，就會搞成今日的田地。

你話呢個情況，邊個似痴線似Joker多d？