既然 1984 年版就上 Netflix:
https://www.gaforum.org/showpost.php...postcount=1421
趁手講多少少背景感想之類,炒埋一堆,希望可以方便睇得明。有錯請多指教:
1. 帝國:由皇帝統治,權力最大;下面有一班封建貴族,皇帝以賞賜「專賣公司」入面嘅董事席位(蘿蔔),同擁有支極強戰力嘅軍隊(大棍);雖然貴族間有互相通婚嘅習慣,但皇室好識搧動貴族間勾心鬥角,用嚟維持長期統治。大貴族之中,故事以 House Atreides 同 House Harkonnen 之間嘅世仇關係為主線。而男主角,係前者家族嘅第一繼承人。
2. 唔好期待好似星戰、 GotG 或者 GoT 咁有大戰場面,第一部書都仲有啲啲,戲份唔多亦只係背景襯托。反而謀略比重更大。亦有好多宗教政治生態互動。
3. 部書好受阿拉伯文化影響,入面有好多阿拉伯語嘅名詞用語;
而故仔有啲似⋯⋯
《沙漠梟雄》 Lawerence of Arabia。
4. 「香料」,成個故仔都係圍繞住呢味嘢嚟轉。係好重要嘅 plot device⋯⋯
內有拋書包兼微量劇透,不喜勿入
古代同現代一樣,香料可以用嚟煮餸、醫病、同埋生活應用上(當然包埋濫用),需求好大,尤其好似溫帶地區無呢樣出產嘅,販賣香料利錢係好大。歐洲人未稱霸海洋之前,古代「海上絲路」其中一樣大買賣,就係香料。阿拉伯商人可以話主宰呢項貿易。遠嚮唐代時期,廣州城有阿拉伯商人社區,唐末黃巢軍攻入廣州,曾大殺阿拉伯人~~~ 後嚟嘅歐洲人,籍帝國主義控制香料貿易,亦大發利市。
講到現代阿拉伯世界出產一樣嘢,經濟運輸上無佢唔得,可以左右全球政治局勢嘅,好易聯想到 -- 石油。作者好巧妙嘅咁將呢兩樣嘢結合埋。所以故仔入面邊個負責開採沙丘星嘅香料,係好難啃,亦係發大財嘅機會。成書時仲未爆發七十年代全球石油危機,作者好有遠見,睇到被殖民嘅有日反枱,揸返住班「帝國」條命根會點。
小說入面嘅「香料」係由帝國官方「專賣」,連同各種商品,由皇族貴族把持嘅「公司」管理,加上生產咁困難,「香料」個價極貴,亦引嚟好多人冒險偷採走私。
小趣味:沙丘星正式名叫 Arrakis,同中東國家伊拉克發音差唔多。
5.
關於 Freman 文化
沙丘星「土著」Freman 因為要嚮呢個五行欠水嘅星球上生存,有極濃厚嘅「重水」文化。其中一樣係反映嚮佢套「標準服」Stillsuit 上面:套杉會吸收返著者全身排放嘅水份,循環返做飲用水;包括呼吸、眼淚、汗,同埋下面啲⋯⋯(咳)所以佢哋見一個人為亡者流眼淚,認為係一種極高尚嘅情操。
人或者動物死咗,佢哋嘅習俗係抽乾死者嘅全部體液(包括血同埋⋯⋯),淨化返做飲用水;死者嘅水比條「咸魚」更受重視。咒 Freman 佢(身體入面)嘅水畀人「搶走」,係視為三大悔辱之一。
吐糟:沙丘星球嘅南極老人星係粒藍白色太陽,唔似咱們嗰粒係黃色,望個太陽係偏藍。但 1984 年版同 2000 年電視版,一去到沙丘星,成個畫面都係黃咁咁嘅~ 書入面都講到明,但係暫時未見有片做得啱。
——————
口痕又噏多少少,套書對後世影響好大,唔係老派科學救世嗰種樂觀,亦唔係嬉皮士文化(表表者係 Philip K. Dick),將宗教政治融合埋一齊,當時應該好新鮮嘅事。其他唔知,單係星球大戰,你當有個沙漠星球做舞台係咁啱,仲有有好多其他「致敬」嘅痕跡:太空「巫師」,Jedi Mind Trick,沙下面有條個口好大嘅怪獸,武打以劍術為主等等。GoT 個作者明言佢套大作都好受呢部作品影響。