[肉羊哩咖]

故事發生嚮極遙遠嘅未來，人類遍佈銀河系，嚮打敗思考機器（人工智能電腦）嘅聖戰，建立咗帝國，再好多好多年之後，帝國開始走下坡嘅故事。

故事嘅主要舞台，係船底座老人星第三行星，通稱為沙丘星（Dune），成個星球都係個沙漠，無乜水，經常有極大嘅沙暴吹嚟吹去，除咗兩極有環山擋住，唔多啱人住。如果咁都未夠差，個星球上面仲有樣極可怕嘅生物 — 沙蟲。沙蟲有成400米以上咁長，40米直徑，經常潛伏嚮沙下面，外皮極度堅固，除非用到核武，一般鎗炮唔能夠殺死佢哋，口入面係一排排嘅利牙，佢有個大弱點，有興趣可以去查下。咁惡劣嘅星球，反而係全銀河最重要嘅星球，因為只係得呢度搵到對人類極重要嘅物料 — 「香料」。

「香料」係由沙丘星開採出類似真菌嘅嘢，再提煉出嚟嘅藥，成年人服用，除咗可以延年益壽，仲可以增強五感，有部份特殊人仕，服用咗可以有心靈感應力，或者極快咁做出計算，嚮呢個無電腦嘅世界，要靠呢啲用「香料」培養出嚟嘅「人肉電腦」，計出星際間超光速通行路徑，無咗「香料」，全銀河嘅交通經濟都會崩潰。（如果去度呢度你覺得本人好似講緊米洛夫斯基粒子，或者 GN 粒子，大家咁話），因為供應咁難，「香料」嘅價錢極貴。同時佢亦有極大嘅負作用，成年人只要一次食多過二克，就會輕微上癮，一上癮就無得戒，一但斷咗唔食就死梗無藥醫。所以「香料」只係貴族同上流人先食得起。啲「人肉電腦」基本上由一個「運輸公會」包攬晒嚟做，因為得佢哋先有呢個培養技術，成為皇室貴族以外一大勢力。（記得畢華流講過，根據部小說開發個遊戲，你就算係運兵，目的係去打個工會嘅話，工會一樣照收你錢～）

故事另一個主要勢力係一個姐妹團 Bene Gesserit，傳說係聖戰之後成立，成員全部都係女，由「聖母」帶領，個會嘅目的，係利用女性最大嘅「武器」— 子宮，用優生學，用極長時間，配種式去「造」出一個「超人類」，精確啲講要係個「超男」，成員表面上服從各主要勢力，其實暗中修正引導全人類嘅發展去向。班姐妹借服用「香料」，同埋特殊嘅身心訓練，唔只好打得，佢哋可以有外人以為係魔法嘅能力，好似用說話控制人嘅行動，讀取他人嘅記憶之類。

記得好多年前出個隻以呢個故仔為題嘅 RTS，台灣譯做《沙丘魔堡》（咁似 Burger King 出品嘅），但無玩過；電影版就有啲啲印象。係咁。