[蛋撻王子]

《相隔七年再闖八強 車路士對馬德里體育會歐聯賽後分析》



相信賽前無人預計得到會係咁既賽果，馬體會傷停球員全數復出應戰，相反車路士有蒙特以及佐真奴停賽實在難免令一眾車迷憂慮，不過喺接近完美既賽前佈署加上全隊戰意十足底下以技術性擊倒馬體會，亦係車路士相隔七年後再次成功闖入歐聯八強，將會迎戰剛擊敗意甲勁旅祖雲達斯既波圖。

今仗杜曹依舊源用三後衛陣式，喺缺少左堤亞高施華、佐真奴以及蒙特之下，再加上基斯甸臣賽前臨時傷出，令蘇馬被委以重任以正選擔當中堅置中角色，而左右拍檔維持魯迪加同隊長艾斯古達，左右翼衛就由馬高斯阿朗素同列斯占士擔任，雙中場方面簡迪依然維持核心角色，配合上場聯賽有輪換休息既高華錫，至於前線方面就繼續起用夏弗斯作箭頭，左右翼鋒就由添姆雲拿以及薛耶治擔任。

馬體會喺首回合落後一球既情況下，加上全員復出賽前一度預計將會全力進攻，但以全場黎睇車路士可以話操控左成場比賽節奏，基本上馬體會所有攻勢喺進入藍軍禁區前都經已被消化，即使成功起腳都只係零星機會，馬體會試圖透過前場壓迫希望盡快搶得球權，但喺受限人數之下反而墮入左杜曹賽前所佈署既圈套，每當藍軍中堅拎波後，成功引導蘇亞雷斯向前壓，而同時左右兩名翼衛以及簡迪或者高華錫會回後作接應，亦即係每次都至少有兩個接應點。

即使紅衫球員選擇人釘人作中前場壓迫，藍軍中堅亦可以選擇長傳到前場，而由於馬體會既中場球員經常被引向前壓，令中間區域時常出現中空情況，提供大量空間令車路士更能輕易地進行推進，所以全場波你都可以見到主隊好容易咁透過猜傳走位就能將皮球運到前場，而客軍球員一面迷惘地感覺到進退失據咁，即使施蒙尼喺半場調整後令前中後三線連接緊密起黎，不過杜曹亦指示球員推快向前傳球及反擊節奏，令馬體會不得不繼續將注意力放到防守上。

最後都要一提艾斯派古達上半場喺自己禁區既一下出手犯規，感覺上的確係有走甩之嫌，不過果球即使判為十二碼再被射入追平，預計車路士亦有能力再次取得入球優勢；杜曹經歷大戰連場後依然保持不敗，仲洗唔洗繼續証明自己？相信車迷們亦自有定案...

Fanpiece - 藍獅: https://football.fanpiece.com/bluexl...feature=scroll