兩德甲球會斟挪威新人王 同曼聯鬥搶
利物浦簽南野拓實,薩爾斯堡另一矚目球星、19歲挪威新人王夏蘭特動向仲有好多可能性,傳媒估計曼聯靠蘇斯克查同該球員關係,應該佔得先機,但另有消息指夏蘭特到訪兩間德國球會,睇嚟曼聯要簽到呢位新人王,蘇B要加把勁。
據報道,夏蘭特喺薩爾斯堡嘅違約金只係2000萬鎊(約2億港元),但由於佢愈嚟愈紅,仲有曼聯、祖雲達斯,再加兩支德甲球隊有機會加入爭奪行列,其最終轉會費相信唔會少。
當地時間周三,夏蘭特在經理人陪同下,到訪多蒙特及RB萊比錫訓練場,傳媒估計係同佢未來動向有關,一般預計夏蘭特於明年1月轉會窗必定轉會,問題係目的地未定。
歐聯利物浦對薩爾斯堡當晚,有多達40位球探現場觀看夏蘭特表現,不過要數最有機會簽到夏蘭特嘅球會,始終係曼聯,傳媒估計,主要原因領隊蘇斯克查係挪威人,由佢簽挪威神童,係好合理嘅事。