2020/21 英格蘭超級足球聯賽第二十六周 - 車路士 VS 曼聯
全場完,車路士0:0曼聯
上半場兩隊算係比較均勢,車路士開段有幾次盤扭,試圖快速入攝至禁區射門或落底線傳中,5分鐘對方球員從後場一直帶波跑前至左路傳中,被麥湯米尼解圍,6分鐘接應隊友短傳後嘗試係小禁區起腳但被連迪路夫封阻。而曼聯方面亦不斷尋找機會攻門,13分鐘麥湯米尼被侵犯獲得罰球機會後,由福仔勁射可惜被門將打出,其後格連活特係禁區邊位置搶波時,對方球員一度有手球之嫌,但球證經VAR後表示車路士並無犯規,比賽繼續。中段時間20分鐘對手係右邊抽射射斜出界,31分鐘麥湯米尼回傳俾迪基亞,再大腳解圍但無力,對方球員接應立即勁射不過高出,35分鐘對手右路邊線傳中俾前鋒頭鎚攻門,結果頂唔中出界反而仲撞向門柱。完半場前40分鐘費特搶波後用假動作騙盤扭被對方球員鏟走,梳爾拿波再短傳俾般奴燙射但射中人出界,半場完。
下半場47分鐘對手係左路快速突破,落底線傳中俾隊友再撞射被迪基亞擋下,有人補射又被梳爾截糊,隨後經過一陣混戰,曼聯製造幾次威脅攻勢,係59分鐘格連活特接應占士傳球後推過對方球員起腳但高出,以及60分鐘梳爾落底線傳中,雲拜沙卡右邊接應再後傳俾麥湯米尼勁射,可惜被門將救到。中段時間62分鐘福仔左邊射門被門將接實,67分鐘費特靚燙射可惜僅僅高出,蘇斯克查睇到拍爛手掌...79分鐘馬斯亞入替格連活特及麥佳亞犯規領黃。直至比賽完結雙方依然處於僵局,最終車曼大戰兩隊以0比0握手言和,留意返蘇斯克查剩係用咗一個換人名額。