《唔完美 可接受 但亦都要改善 車路士對利物浦賽後分析》
「唔完美，可接受，但亦都要改善」哩句話可以總結左今場藍紅大戰...
賽前都預計過林伯特會繼續以433陣式應付利物浦，始終季初喺超級盃決賽都睇到，利用番上季沙利既戰術藍圖係能夠同哩支應屆歐聯冠軍抗衡，而由三後衛中抽調左基斯甸臣拍湯姆利作雙中堅，簡迪同蒙治亦養傷復出，以開波既既陣容黎講其實都尚算完整。哩場波主要分兩個部份黎講，第一個部份係上半場四十五分鐘以及完場前十五分鐘既「車路士時間」，而另外就係防守死球處理既部份。
先講「車路士時間」，應驗既係藍軍又一次贏形勢輸比數，車路士其實掌握左全場波達70%既形勢，但關鍵在於一直都唔能夠成功將個波放入網，而製造既機會亦都唔係少，艾巴咸上半場一次黃金機會入唔到波固然抵打，而喺場波最後十五分鐘車路士都有幾下破網機會入到，
包括巴舒亞伊無人看管下既頭槌，以及蒙治左路既門前飛機，以比數哩講一比二係失左三分，但其實比賽內容並唔能夠說明左哩場波既戰術內容。
至於防守死球方面，先講失既第一球，
阿諾直射入網果下其實艾馬臣係可以嘗試遮線，但佢無咁做到，而喺哩下之後亦隨即被阿朗素入替，未知究竟係艾馬臣因為小腿經已受傷而無嘗試遮線，定林伯特喺防守死球方面本身無做哩個安排，第一球失波係可以做得更好。至於第二球又係啲典型角球失波，車路士採用既防守角球係用區域聯防，而唔會man mark咁一對一進行防守，主要係每位球員負責返自己前後左右身旁既空位，
而今次就因為阿朗素既失位而做就法明奴射入。
講完兩大部份，就想抽某幾個球員黎講下，先講湯姆利，今場幫被林伯特委以重任打正選，之前都有講過哩位英格蘭小將其實喺個人防守方面既技巧唔算太好，但佢係一個速度相當之高既後衛，
就好似今場波面對住沙拿咁，即使因為個人失誤而做就左機會比對手，亦可以利用速度去彌補番自己所製造既失誤，如果假以時日再改善埋自己既防守技術之後，相信絕對能夠立足於英超之中。至於另外想講既係艾斯派古達同韋利安，佢地個近兩季都係車迷比較under rate既球員，但其實今場波好多時既推進都係好依靠佢地兩個，
前者雖然速度上未必追得上對手，但佢前插同長傳都幫助左球隊唔少，始終唔明白點解有球迷話佢交波唔準，就算睇番哩幾場波佢啲斬波都中隊友位置，
至於韋利安就更加唔洗講啦，全場波助攻助守，係略嫌佢有幾下都差啲同簡迪撞車，但正因為咁先睇到韋利安喺防守方面既付出，如果你話著得起件十號就唔應該係做哩啲的話，咁你應該從「非一般」的十號去睇應該會容易接受啲。
至於林伯特喺今場波既戰術配套，個人認為佢都真係做盡了，沙利所遺留既433藍圖再加以改進，將傳球速度再度推快，減少不必要既傳球，隊友相互之間既走位更加靈活令對手不能預計，亦令到佐真奴踢得比以往較為輕鬆能夠將體力調配到防守方面，單單係以上哩幾點既改善其實都經已值得比一個合格線以上既成績，再加上上半場經已因傷而作出兩個換人調動，下半場其實可以變既板斧亦都無太多。
不過開季至今仍然未能喺主場打開勝利之門，林伯特有必要再喺一啲細節上再加以微調及改進，
而黎緊既聯賽盃賽事亦係一個比主力球員休息而年輕球員發揮既好機會...
Fanpiece - 藍獅:
https://football.fanpiece.com/bluexl...feature=scroll
