地位上升!格連活特下季或着傳奇號碼
曼聯18歲新星格連活特今季表現大勇,於各項賽事合共轟入17球,追平3位傳奇名宿傑特、佐治貝斯、朗尼,成為紅魔鬼史上單季入波最多嘅20歲以下球員之一。會方非常重視呢位天才球員,領隊蘇斯克查打算下季將11號球衣交畀佢。
隨住阿歷斯山齊士落實永久轉投國際米蘭後,佢件「傳奇7號」新主人係邊個,備受關注,一般相信如果曼聯簽到查頓辛祖,就會將7號交畀佢。會方同時想將11號波衫畀埋格連活特,畢竟佢已經成為鋒線重要一員,應該着番件「主將球衣」。
曼聯11號屬於名宿傑斯「個人標誌」,地位拍得住「傳奇7號」,加上格連活特人氣高企,如果佢由現時26號轉為着11號,波衫肯定熱賣,曼聯又可以大賺一筆。
不過,自從傑斯退役後,2位着過曼聯11號嘅球員贊奴沙、安東尼馬迪爾表現都麻麻,安東尼馬迪爾之後改着番9號,立即翻生,唔到你唔信邪,格連活特真係要自求多福。