Games Animation Forum

主題: [美劇] 有無人睇Netflix?
查看單個文章
舊 01-05-19, 07:06 AM   #649
肉羊哩咖
God of Gamer
griffin611
 
註冊日期: May 2008
文章: 5,336
引用:
作者: aquarius 查看文章
呢套我算了
未試過睇動畫睇到咁悶..
呢部戈C9 唔抱任何期待去睇會好啲掛~~~

罸叔斷估如無意外都係拉屎一季,不過期待去都去得好好睇睇~

------

終於煲晒全8季 Nextflix Voltron,如果好似S1/2/7/8 咁,13 話一季咁計嘅話,應該都係6季咁長,因為S3/4/5/6 都係6或7話一季,好怪。全部78 話,都唔好話唔煲到氣咳。

首先,唔好當佢日系超機人咁去睇會好啲,反而似無乜超機人情節嘅戰隊咁樣。總括嚟講都叫OK

好嘅:

畫功一流,間中有啲手繪風,人設都好,表情時有啲日系色彩。機機設都唔錯,CG做出嚟好畀到個巨大感。超機人戰鬥去到最後兩季勁精彩。故仔偏重人物,幾好,尤其主要角式之間嘅互動(主要係拗頸)同埋冒險情節都幾緊湊;戰鬥場面,對住班機械獸(無譯錯,入面真係叫做robo-beast )好睇,又未到Gridman 個程度,但叫好好;主要人物都好多,但幾個突出嘅,好似黑戰士、紅戰士、藍戰士同公主都寫得幾好。故仔著重團結,好多時開埋主角威能都未必嬴,要靠班配角嘅合作先化解都危機。

唔好嘅:(唔好意思,有少少 Honest Trailer 上身)

雖然係比較兒童向,都好多嘢唔多合理--既然五隻獅子分散去宇宙唔同角落,點解偏偏全部獅子都揀主角呢班地星人?成個宇宙咁大真係無人啱?奸黨係統治咗成個宇宙(係成個宇宙)成一躉年以上嘅大帝國,但成78話出過嘅機械獸十隻手指幾乎數得晒咁滯,仲要幾乎隻隻都係勁難打,啲資源反而落晒去啲卒仔戰機度?S1同S2個大波士好沉迷搶齊五隻獅子,但幾乎次次都派埋啲巨艦大炮去炸,啲獅子又鬼咁硬,無乜邊次可以捉到,搞乜?

由於個設定主要都係有(超)科學做設定,但班主角好多時拋埋啲唔知咩嘅懶科學名詞出嚟,對故仔又無幫助,聽到一頭霧水;最衰奸人嗰邊硬係加件巫婆出嚟,又要超屈機,主角隻揪親都幾乎要搵計走人,咁要班軍佬嚟做乜?仲斃嘅係奸角除咗大奸嗰三件之外,其他個個都係咁上下樣,好多都係出現一兩話,即使有得再出場都唔講都認唔出~

講開人物,綠戰士同黃戰士都幾配角,不過後嚟綠戰士有條家庭線,叫做好好多;反而黃戰士由頭都尾,除咗搞下笑,佢啲線仲弱過公主個管家。
唔想透嘅不過⋯⋯
到 S2 爆出嚟話綠戰士係花木蘭嚟,但衰在係公係乸對佢條線同成個故仔都無影響,你繼續當佢係仔咁睇無問題~


頭兩季仲有個大問題就係好慢,講一個地方可以玩成兩三話,去到S2 快返啲,可能班編劇見咁玩法唔掂,索性去到S2 尾嚟次轟轟烈烈嘅決鬥,順手 soft reboot埋;S3 個新大波好似好好多,美形,打得,聰明有計謀,又口甜舌滑,身邊仲有四件「靚女」伴住(梟博士?),食住班主角嚟玩,點知玩咗三話就唔見咗,跟住去到S4 尾佢再出現返,佢啲線幾乎最好睇嘅部份。

五隻獅子都有啲問題:唔計佢有無限裝甲(點打都唔爛),幾乎無限 EN,佢好似有自我意識,識同駕駛員心靈相通(包埋 memory dump),可以根據劇情需要提示駕駛員用咩武器,仲識自動因應劇情出新武器或強化現有武器;最絕嘅係有 share account,仲可以兩個人同時爭 login,有 "Find My Lion" 功能,又可以因應劇情獅子自行取消同更改登錄~ 去到後尾可以有埋 remote login, 同 remote control~~~ 仲有兩話連 virtual machine 都玩埋,死未?

注意:原本隻《百獸王》(啫係 Deadpool 玩緊嗰隻),呢度有一話有個 cameo


__________________
「敵人犯緊錯嘅時候,你千祈咪咁多餘走去阻止佢。」-- 拿玻侖
「我絕不要恐懼。恐懼會扼殺思維能力,這個潛伏的死神,會徹底毀滅一個人。我要容忍它,讓它掠過,穿越我的身心。當這一切過去之後,我將睜開心靈深處的眼睛,審視它的軌跡。恐懼如風,風過無痕,惟有我依然屹立。」—— Dune
「最大嘅失敗,就係唔知點解失敗。」
「跌低咗仲繼續,係遇到錯折;唔爬起身,係失敗。」
肉羊哩咖 目前離線   回覆時引用此篇文章
 

返回主題: [美劇] 有無人睇Netflix?