2021/22 歐聯分組賽 - 曼聯 VS 維拉利爾
全場完,曼聯2:1維拉利爾
上半場開段2分鐘C朗左邊試腳高出,之後曼聯又多次嘗試從左路吊入禁區但可惜落點都太近門將,而對方則係6分鐘左路窄角度起腳被迪基亞雙手撲出,9分鐘又再係左路cup過達洛治燙射,又被迪基亞飛身救出。雙方互有攻勢,但明顯維拉利爾嘅攻勢入肉得多,16分鐘對手又一次係左路傳中俾門前嘅隊友頭鎚頂中,又頂唔過迪基亞十指關。反而曼聯只憑住C朗、般奴等人組織攻勢,但傳球質素十分一般導致好容易被對方球員封位。30分鐘對手遠射地波僅僅斜出,44分鐘右路射地波再被迪基亞救出,半場完。
下半場52分鐘維拉利爾攻破曼聯大門成0比1,達洛治未能及時攔截之下,對手接應左路傳中撞射入網。55分鐘般奴遠射斜出,其後黃潛開始換入幾名後備球員。59分鐘曼聯立即追回一球至1比1,般奴罰球傳俾泰利斯靚抽彈地入網,士氣可謂扳回一成。60分鐘辛祖禁區內接應傳球試圖起腳但第一腳控得唔好被門將輕鬆接實,到中段時間雙方都有出現犯規被罰黃牌。72分鐘黃潛再換入三名後備球員補充球隊體力,而曼聯方面則換入馬迪及卡雲尼,78分鐘卡雲尼跑至門前頭鎚頂中可惜頂斜出界。尾段時間85分鐘對手左路斜射被迪基亞撲到後,個波飛向對方球員面部再反彈,迪基亞再救到之下,華拉尼及泰利斯成功封位,相當驚險。1比1嘅僵局都係要大哥出馬,C朗94分鐘門前窄角度補中入網,令曼聯成功絕殺黃潛,全場完。