|
艾摩廉點頭 曼聯迎自由身中場回巢
曼聯新帥魯賓艾摩廉上任後，球隊勢必再次進行重建，不過有傳曼聯買人資金有限下，轉會策略要更加精明。據英國《太陽報》報道，曼聯已鎖定英格蘭中場安祖高美斯為目標，呢位曼聯青訓明年夏天同里爾約滿，最重要係艾摩廉亦點頭同意呢次收購行動，令成事機會大增。
現年24歲嘅安祖高美斯，早喺16歲嗰陣就曾代表曼聯一隊上陣，可惜之後一直上唔到位，4年前黯然離隊。安祖高美斯之後愈踢愈好，最近更做埋英格蘭大國腳，由於佢同里爾合約明年夏天結束，而且續約談判亦失敗，據報曼聯已鎖定佢為目標，希望免費簽佢返嚟，而且新帥艾摩廉亦對呢位中場非常賞識，表明支持球會收購計劃。
曼聯視安祖高美斯為卡斯米路接班人，呢位中場早前亦暗示願意重返曼聯：「曼聯喺我心入面永遠有特別位置，我有冇幻想過有一日會返去？當然有！曼聯係我嘅屋企，不過足球場上嘅事冇人預計得到，我要做嘅係腳踏實地踢好自己嘅波。」
|
