|
2023/24 英格蘭足總盃第五圈
森林 VS 曼聯
全場完，森林 0:1 曼聯
一個月後返到足總盃第五圈作客對陣森林，係再次出現多名傷兵情況下，曼聯能否有十足把握面對曾於今季英超被擊敗嘅森林，仍然係未知之數，加上上仗被富咸切斷連勝，下仗又需迎戰曼市打吡，士氣方面的確係一大考驗。睇返正選陣容，由於賀隆馬斯亞等人繼續因傷缺陣，仍要靠福仔擔當正前鋒，至於安東尼加拿祖正選左右兩翼，配搭中場有麥湯及上仗頭部流血嘅卡斯米路，後防方面左閘及中堅各有調動，安拉拔頂替左閘，連迪洛夫頂替稍有受傷嘅麥佳亞。
上半場兩隊互有攻勢之餘，早段亦出現不少黃金機會，包括3分鐘般奴開出角球後橫傳，安東尼遠柱接應燙射力度十足，可惜欠運中楣彈出，6分鐘有麥湯文尼接應右路達洛治傳中，後上插入小禁區頭鎚一頂頂得太正被門將撲到，後有安東尼接應般奴左路傳中再頂被門將接實。8分鐘輪到森林攔下曼聯開出嘅界外球，一記斜傳順勢於右路推前右腳斜射，奧拿拿雙手接實，14分鐘有連迪洛夫落鏟封阻對手右路底線傳中。然而兩隊積極對攻之下，雙方防線都如同中門大開，曼聯方面卡斯米路及麥湯一對防中推得較前，後面只有華拉尼及連迪洛夫一對中堅，以及安拉拔防守，但17分鐘安拉拔一次回後相當驚險，被對手快一步搶走球權推前再斜射，奧拿拿飛身救出。半場尾段曼聯最有威脅嘅一次攻門，來自達洛治右路K角位傳中，近門有麥湯頭鎚攻門被對方門將救出，暫時雙方未有把握到機會返入更衣室。
下半場兩隊繼續互攻，先係早段森林48分鐘右路一記直線交俾前場，cup過達洛治推大位起腳，奧拿拿再次訓身撲出，達洛治大腳解圍出橫邊，51分鐘又係森林一次從右路嘅,攻勢，K角位帶波越過卡斯米路及安拉拔後斜射，同樣係奧拿拿雙手擋出。早段形勢由森林主導，到57分鐘曼聯先站回陣腳，安東尼嘗試推大位禁區頂直射被門將接實，62分鐘亦有般奴腳面一射高出。中段時間兩隊依然尋求機會撕破防線，較為近磅一次係65分鐘般奴接應加拿祖撞射，門前麥湯文尼加一腳斜出底線。比數要到尾段時間87分鐘，由卡斯米路打破僵局，般奴開出罰球後，近門有卡斯米路入攝頭鎚頂中入網成1比0，最終亦憑住卡斯米路一記頭鎚小勝森林1比0完場，下回合需對陣利物浦。
|
