|
2022/23 英格蘭超級足球聯賽第十八場 - 曼聯 VS 曼城
全場完，曼聯2:1曼城
上回合曼市打吡作客輸成3比6，上半場一直被曼城猜傳狂攻，下半場雖然憑住馬斯亞連追兩球，加上安東尼一腳靚燙射叫做幫曼聯挽回些少面子，但整場計曼聯合共失六球被曼城完敗，令唔少曼迷賽前都擔心，今場返到主場嘅曼市打吡會否再次被技術性擊倒。不過自世界盃後曼聯一直處於連勝姿態，士氣信心都有增無減，返到主場亦有球迷打氣支持，而對手近期於聯賽盃出局，部份核心球員如迪布尼等人更係狀態一般，只係左右兩翼基利殊及馬列斯fit到漏油，只要針對防守得宜，相信曼聯有能力一戰。
上半場開段兩隊相對放慢比賽節奏，但同時都在互相博弈，試探對方嘅部署，直至10分鐘艾歷臣中路派牌俾右邊嘅般奴斜射出界。其後兩隊繼續以保持控球為主，試圖於中場組織短傳連結發動攻勢，不過曼聯派出費特負責專心看管曼城進攻核心迪布尼，可謂十分成功，迪布尼無太多空間傳球，繼而令中間嘅夏蘭特係上半場失去傳球供應，觸球次數大減，夏蘭特僅有嘅起腳出現係23分鐘禁區內推順再射，被卡斯米路封阻彈出。而且曼聯防線相對整齊有紀律，當有一個上前對位防守時，其他隊友會立即補位，禁區頂及中路亦有一對巴西防中加艾歷臣試圖封阻，令曼城係上半場幾乎無辦法攻入禁區攻門，比起上回合甚至上季嘅曼聯都有明顯進步。攻勢方面曼聯竟比起曼城更有威脅，33分鐘福仔左路接應般奴長傳，推過出迎嘅門將艾達臣，再窄角度射近柱射中艾簡治解圍，之後馬斯亞試圖頭鎚攻門被艾達臣跳高接實，36分鐘又係福仔接應艾歷臣中路直傳，可惜被艾達臣早一步出迎沒收，完半場前45分鐘獲加一記遠射柱邊出界，雙方都無取得入球返入更衣室。
下半場坦帥並無換走半場疑似拉傷嘅福仔，反而換走馬斯亞換入安東尼。開段兩隊互有攻勢，51分鐘艾歷臣開出罰球，華拉尼禁區內跑前攻門出界，不過越位在先，53分鐘馬列斯右路傳中至遠柱，小施華頂回中間被華拉尼解圍。59分鐘迪布尼接應馬列斯斜傳跑落底線傳中，後上有基利殊頭鎚攻門破網，曼聯落後至0比1，其實見到曼聯球員體力已經開始跌watt，不過士氣及鬥心並無太大影響。66分鐘雲拜沙卡遠射省中艾基出界，去到72分鐘曼聯換入加拿祖換走體力不繼嘅艾歷臣，福仔踢返正前鋒位置。78分鐘曼聯出現爭議性嘅入球，先由雲拜沙卡於後場推過幾名曼城球員，交俾卡斯米路斜傳俾前面嘅福仔，但處於越位位置嘅福仔並無掂到個波，而係由後上嘅般奴順勢撞射入網，其後雙方球員到旁證旁邊爭論，最終球證判入球有效，曼聯追平至1比1。
相信主要有三點係令球證認為入球有效，第一係福仔肯定無掂到波，第二係福仔跑過身後嘅艾簡治，兩者並無身體接觸，而且明顯有拉開一段距離，又無明顯起腳射門動作影響艾達臣嘅判斷，所以唔算構成企圖阻礙防守，第三係艾簡治見福仔越位在先就以為旁證會吹越位，一早已經有收步動作並無及時回防解圍，但最具爭議應該係福仔有跑向個波嘅方向，所以應該計有參與進攻嘅意圖，球證從呢幾點上其實可選擇吹與唔吹，機會都係一半一半，視乎球證嘅睇法，最終球證判入球有效，只能夠講曼聯佔運。81分鐘後備上陣嘅加拿祖幫到手，左路先傳中省中艾簡治，然後轉身推過艾基再次傳中，福仔門前無人看管篤入反超前2比1，最後坦帥換入多名防守球員包括麥佳亞、麥湯文尼及馬天尼斯守到完場，曼市打吡贏曼城全取三分，今場無論鬥心、士氣及整體狀態上都比曼城優勝，所以值得贏波。
|
