Prey 總結:中間。故仔幾新鮮,個世界設定用 18 世紀嘅印第安人背景,隻怪物係「弱化」咗,但仍然好有迫力,有風景畫面拍得好靚,打鬥嘅茄汁夠亦無留「手」,尤其對住嘅大灰熊嗰段,同班對住班法國佬嘅,都好精彩。
最大問題係主角個身形,打人,識得打嘅,其實都仲可以,對付隻成身武器嘅七尺高怪物,唔係咁有說服力,搵個「科」啲會好啲,仲弊嘅係威能時開時無,公平啲講佢絕對唔係所謂嘅 Mary Sue,有場打鬥就畀啲人打嚟掟去,好似個公仔咁,有時又突然可以一個打 4 個;最誇嘅係有度個腳傷可以好快無事~ 動作係好睇,雖然無乜玩搖鏡,但勁多快咳,好多時一個鏡頭唔夠一秒就跳去另一個角度~ CG 有啲就假得滯。節奏頭一幕太慢,第二幕都 OK,但最後幾趕吓。
睇到最後未出黑底白字之前,有一堆插畫講返成個故仔,最後一格似乎暗示好有下文,唔知會唔會拍續集。
![](images/editor/quote.gif)
定係⋯⋯
見到有三隻 Predator 嘅母船衝緊落條村度,再加上第二話支鎗落咗入去班 Predator 手上,有咪成條村拎晒便當就唔知啦~
女主角個身形令人諗起電影 Serenity 呢句:Start with the part where Jayne gets knocked out by a 90-pound girl 'cause... I don't think that's ever getting old.
按:所謂 Mary Sue,係啲角式設定到完美無瑕,人見人愛,車見車載;無需訓練,唔會失敗,多材多藝,所向無敵,成長欠奉,悶蛋到暈,近年嘅經典例子係星戰後三部曲嘅 Rey Palpatine