而家講，可能早咗少少，不過二月廿四號到而家，軍事上嘅經驗可以總結：
- 軍事唔係政治嘅「伸延」，而係政治手段嘅一種，學田中芳樹老師話齋，係最污糟邋遢嘅一部份。
- 「老校」少少，正如《孫子兵法》講：未打，先要「計數」，要了解已方嘅情況，同埋敵方嘅情況。少咁樣，計錯一樣，個後果都唔同。
- 好明顯布丁唔止計錯人哋，呢方面好多樣，有機會繼續；同時亦計錯佢統治下嘅形勢。
- 唔係話烏克蘭無問題，天堂一個，佢國內政治仲有好多問題，貪污腐敗嘅亦有，法治不足又有，軍隊整備不足嘅問題，開戰初期好明顯。
- 烏克蘭政治上嘅優勝，唔止係可以上下圃結，更（真係）成功爭取到西方大部份國家有形同無形嘅支持，部份國家仲唔分上下，仆心仆命咁去幫手。
- 於勝負往往在於係邊邊犯錯少啲。
- 初期戰略上俄國好囂張，以為可以輕易一下子奪取到首都基輔就掂，但由計劃到執行完全錯晒。
- 但失敗之後唔識轉軚，拖咗兩個月都久攻不下，一個世界第三大嘅軍事「強國」，「戰鬥民族」，淪為國際笑話。
- 有幾家嘢過佰年都無變，仍然主宰戰場嘅 -- 補給、情報，數量、指揮、機動性、火力同埋士氣。
- 開戰初期基輔戰線顯示到俄國嘅補給系統，尤其嚮長距離，深入敵境，極之唔掂，似乎忘記咗二戰以嚟嘅經驗，忽視卡車作為前線嘅「血管」，過度依賴鐵路運輸，須知而家唔係 1914 年，軍隊嘅機動性強好多，亦更為依靠遠離鐵路連輸嘅方案。
- 相對補給線貼近俄土嘅東部同南部戰線，戰果比較理想，但之後擴張戰果，亦陷入難以吋進嘅困境。
- 情報，後面嘅「文宣」，電子戰，兩方都不相伯仲。俄軍利用較先進嘅干擾系統，亦取得一時局地優勢。
- 相反，烏軍因為內線作戰，由上至下嘅情報收集，加上兵種使用同西方嘅支援，好多方面都比俄方優勝。
- 尤其俄軍好多時無利用步兵同無人機作先頭偵察，往往跌入烏軍老早怖下嘅陷阱。
- 另一方面，俄軍訊息保安有比較嚴重疏忽問題，小至被伏擊，大到一個營行動被攻擊，甚至物資堆団庫被炸，前線高級指揮「被攬炒」，百幾日以嚟無改善過。
- 數量無疑俄軍有絕對優勢，相對初期過度分散，四月之後集中攻擊部份戰略目標去東部，作出適當調度，令該區嘅烏軍陷入困境。
- 但由於呢度講其他嗰幾方面問題好大，結果係數字上就算好利害，但實際效果上事倍功半。
- 講雙方軍隊裡面嘅貪腐都好嚴重，往往由上至下嗰種結構性貪污；但烏方因為呢戰影響生死存亡嘅關係，似乎暫時壓得住呢個問題，或者未畀外界所知都唔定。但俄軍開戰以嚟，因為制度嘅關係，好多指揮唔稱職同能力相當有限。
- 將火力同機動動性拉埋一齊講：開始時候兩軍都有大量前蘇聯時代留低嘅裝備同戰法 (doctrine)，打起上嚟理論上不相上下；但係至從 14 年克里米亞戰爭之後，烏軍加強同北約合作圖強，由裝備、戰術、思想到訓練都開始融合，但係好慢；到開打之後，就加速得好快。
- 俄軍武器上相對地較烏軍先進，數量亦佔絕對優勢。但受制於其他提到嘅因素，拎唔到著數，好多時仲處於下風。
- 無論陸軍炮兵同空軍缺乏精確引導彈藥嘅情況最為明顯，根據 91 年海灣戰爭嘅經驗，呢類「聰明」武器永遠由於多多益善，點都唔夠用。俄軍錯在早前支援敍利亞阿薩德政權打擊反抗軍，已經用咗唔少，而家整多條戰線，又撞正禁運，補充慢晒落嚟。
- 後果係，一嚟無能力拎到絕對空優，無呢類武器用嚟「壓制敵方防空系統」(Suppression of Enemy Air Defense SEAD)，己方空軍作戰時往往受制於敵人長程地對空飛彈系統，加埋無引導武器，要投放大量彈藥，又唔多打得到實際要打嘅軍事目樣，反而下下「誤炸」平民。有分析指俄軍嘅轟炸，只有三成左右命中軍事目標。
- 雖然火炮係可以打擊烏軍嘅防空系統，但只限於短程類型。要對付長距離嘅系統嘅仍然一籌莫展。
- 呢種浪費，長遠嚟講，唔止火力，會令成個軍事運作陷入惡性循環。
- 雖然係噉講，每當俄軍能夠好好集中火力，效果仍然相當可觀/可怕，唔單止可以干擾烏軍補給，兵力無法止有效運動同集中，亦可以摧毀士氣。
- 俄軍四月以嚟好單純咁持住呢個優勢嚟進攻，或者阻絕烏軍嘅反攻，但後遺症亦相當大，俄軍會點處理，或者唔處理，要多啲情報先知。
- 至於士氣，俄軍由開戰時嘅醜態 -- 搶略食物，裝備殘舊不良，到不時傳出有逃兵同拒絕接受命令嘅情況報導，雖然無法子得知全部真相，就算係個別事件，但呢個隱患，要幾時會影響實際戰果，可能要多等一排先知。至於烏克蘭方面，表面上係做到全國上下一心，就算係真，若果戰事持續膠著，呢方面亦唔會樂觀。
