過咗無事先講…
我又被599J強制檢測了~!
已經係第4次了,之前3次係個人的599J,
個人強檢係DTS檢測,
自己收集朝早未刷牙時的口水樣本交去收集箱
。
(最近一次係今年1月中)
今次係成幢大廈變「受限區域」圍封強檢,
安排去臨時採樣站接受
鼻腔和咽喉合併拭子樣本採集及毒病檢測。
流程上大約係:
晚上7時電視新聞出完公告,
睇CCTV見到大門入口已經變成有入無出圍封mode。
8點半左右有人上門拍門登記現時住戶人數。
9點左右再拍門通知住戶落樓去臨時採樣站,
安排上都有d亂,同一時間通知不同樓層多戶一齊出門,
變咗排隊搭電梯,同埋出現罕見的飛lift情況,
不停站電梯即將駛經本層…
落到地面發現正門外,
已經用橙色膠帶整咗個結界嚟引導住戶去球場。
去到球場人多到行花市咁款…
(咩防疫、社交距離都係口號嚟)
再排隊等工作人員用notebook登記身份證、電話拎樣本瓶,
電話隨即會收到SMS通知完成登記及樣本瓶編號的資料,
之後再排隊去臨時採樣站接受鼻腔和咽喉合併拭子樣本採集。
排完臨時採樣站,又要再排登記多一次個人資料(身份證、電話、住址),
本身話要帶佩戴手環去證明接受咗強制檢測,
但唔知係咪數量唔夠,排到去拎物資包的時候又話有收到SMS就OK了…
上街坊群組睇返就有d人係被帶上手環、有人係收到一張"行街紙"(紙本的證明)、有人係只有SMS(例如我,唔係排先果一批,中間果群),
我諗可能係手環無貨、printer無墨水/jam紙
或者開頭電子版未set好機之類的情況,到我的時候就係用iPad Air登記的。
個物資包內容有:
印尼製印尼撈麵 X3
中國製午餐肉罐頭 X1
阿聯酋製茄汁焗豆罐頭 X1
菲律賓製茄汁沙甸魚罐頭 X1
泰國製粟米罐頭 X1
拎物資包時,街坊問了一句:鮑魚呢?
然後補上一句:無就算,唔係困我5日就得了。
成個過程大約用了45分鐘完成,10點前已回家。
最終我係第二日凌晨5點幾就收到SMS通知檢測結果為陰性。
可能風水好,到朝早得知成棟最終都無人出事已解封~!!!
雖然實際失去自由的時間比較短,
但覺得屎渠抽屎水「污水樣本呈陽性」呢條屎橋真係好累街坊…