曼聯9.2開操！雲比沙卡爛玩要隔離
曼聯將於9月2日復操，備戰新球季，但右後衞雲比沙卡因為無視球會建議，竟然去咗疫情「高危地區」杜拜旅行，回國之後需要隔離14日，意味將會錯過開操初期訓練。
根據英國《每日郵報》報道，曼聯教練團喺假期之前，已經向球員發放旅遊指引，講明有邊啲地方，旅行完回國唔需要隔離，但雲比沙卡卻選擇去指引名單上冇嘅杜拜。
根據英國政府規定，雲比沙卡去咗「高危地區」，必須提供96小時內正常檢測報告，先至可以返回英國，而且仲要隔離14日。雲比沙卡可能要等到9月10日，先至同曼聯隊友一齊操練。
曼聯將於9月19日出戰今季第1場英超，主場對水晶宮，雲比沙卡身為球隊必然正選，今次咁搞法，隨時影響紅魔鬼備戰工作。
