曼聯顫抖吧 西維爾神數據預示必捧盃
西維爾打入歐霸盃4強之後,將會遇上英超豪門曼聯,戲碼夠晒強勁,紅魔鬼下半季大勇,加上係2017年冠軍,照計可以秤先。
不過,任何球隊喺「歐霸之王」西維爾面前,都顯得渺小,呢支西甲勁旅史上5次入歐霸盃8強,最後都成功捧盃,果然依家打入埋4強,向冠軍又行近1步,恐怕曼聯都阻唔到佢哋奪冠。
西維爾屬於歐霸盃史上捧盃次數最多嘅球隊,總共達到5次(2005/06、2006/07、2013/14、2014/15、2015/16),其中2014至16年更加創出3連冠霸業,令歐霸盃有「西維爾盃」之稱,西維爾亦被網民封為「歐霸皇馬」。
事實上,過去10屆歐霸盃有6屆冠軍落入西甲球隊之手,英超佔3屆冠軍,包括車路士獲得2次,曼聯獲得1次,另一屆冠軍屬於葡超波圖。因此,曼聯今屆4強鬥西維爾,可以話係提早上演決賽。