盧祖「愛回家」！將成為交易籌碼
盛傳曼聯即將簽入士砵亭中場波基斯費南迪斯，英國《每日郵報》指交易總值達6000萬鎊，當中包括5100萬鎊轉會費，以及紅魔鬼要送埋後衞馬高斯盧祖畀士砵亭。
據悉，曼聯唔想畀太多現金，於是提出將馬高斯盧祖列入交易籌碼，呢位29歲阿根廷國腳曾於2012至14年效力士砵亭，並打出名當，結果被曼聯收購。
士砵亭方面非常了解馬高斯盧祖嘅實力，加上佢當年為球隊作出唔少貢獻，所以歡迎佢回巢，願意接受曼聯提出嘅條件。換言之，只要曼聯簽入波基斯費南迪斯，馬高斯盧祖就好可能隨即離隊，重返士砵亭。
近期一直指曼聯另一位守將艾舒利楊格將會離隊，但依家馬高斯盧祖可能快佢一步。
