傾掂合約!曼聯冬季首簽48小時內完成
曼聯收購士砵亭中場波基斯費南迪斯,取得重大進展,葡萄牙媒體育TVI24指,紅魔鬼已經同士砵亭及呢位25歲葡萄牙國腳達成協議,可望於48小時內公布完成轉會。
曼聯早於上年夏天已經想簽波基斯費南迪斯,但最終未能成事,冬季轉會市場重開後,又再出手。士砵亭一度要求6000萬鎊轉會費,曼聯還價5500萬鎊,由於未有其他球隊加入爭奪,呢支葡超勁旅惟有接受曼聯報價。
意大利《米蘭體育報》指曼聯亦已經同波基斯費南迪斯價掂合約,向呢位「葡國林柏特」開出一份5年半合約,年薪達到512萬鎊。
據悉,「波費」經過上年夏天轉會失敗教訓之後,已敦促士砵亭同曼聯盡快完成交易,希望早日為紅魔鬼上陣。
波基斯費南迪斯今季為士砵亭於各項賽事上陣24場入15球,屬於高產中場。佢亦有份同C朗一齊協助葡萄牙捧上年歐國聯冠軍。