無神論者的巴別塔

從理大回來，心中懷有太多複雜情緒：我的好朋友林匡正以記者身份被捕了，而佢響被捕之前不久，我先同佢一齊做緊直播，只係某啲原因先令我逃過被拘捕命運；見證住多條戰線嘅年輕人點樣想試透過衝擊警方防線卻失敗；睇住幾個廢老KOL安坐冷氣房指點江山、大呼中計、食人血饅頭甚至嘲笑抗爭者抵死，然後前線持續響佢地廢噏之時流血不止……但我諗響講一切之先，係有責任澄清一啲事實：

一、理大之戰同中大之戰有乜唔同？

我唔知究竟有幾多人係想將中大守橋戰模式照搬去理大再打一次，但至少響我角度黎講，兩者係完全唔能夠相比。首先，中大之戰最大嘅重點從來都唔係守橋，而係大家一早已有心理準備萬一警察攻入校園之後，點樣利用幅員廣大嘅校園範圍進行隱藏、反包圍。

然而理大嘅地理環境卻係完全唔同：校園範圍太細，令到抗爭者係完全無戰略縱深，可以容納嘅人數係相當有限；即使響星期日下午守校高峰期，目測理大範圍最多都只係得幾千群眾聚集，而且當入黑隨住防暴將包圍網收窄，絕大多數市民都係一哄而散而非走入校園，同中大當日有過萬人響校園內嘅情況係兩回事。

此外，當日中大之戰能夠依賴以千計車陣封鎖大埔公路同吐露港公路，令警方車隊要擔心有入無出嘅風險；但理大交通網卻係四通八達，外加就近尖沙咀警署極容易支援，所以鄧炳強先會放心一擲2000警力關門打狗，外圍即使有上萬群眾嘗試救援亦只能望門興嘆。

二、理大之戰係咪中咗差佬計？係咪錯在戀戰打堡壘戰？

即係呢啲坐響冷氣房睇住直播坐而論道廢噏嘅兩位廢老KOL，唔撚該收皮。

1. 廢老KOL話警方特登唔封紅隧設局，令市民番工不便從而默許警方攻入校園，呢種諗法真係唔知痴咗邊條筋：大佬而家攻入大學校園係人道災難黎架！點撚樣默許呀？即係你番工唔方便，就會容許六四事件發生？傻撚咗？

2. 咩星期六特登扮攻唔倒入去，引更加多人星期日入去守再一網成擒就唔撚該收皮啦：如果星期日理大真係多人到好似中大咁，根本警察連封鎖包圍嘅能力都無！由頭到尾理大都從來未夠人過！

3. 即係未去過前線，唔該唔好廢噏咩戀唔戀戰，你估個撚個勇武都係覺得好似打機咁覺得好好玩所以唔願走？你有無睇過班勇武派嘅遺書呀？直到今朝理大經已守無可守，嘗試用盡一切辦法突圍果刻，仍然有班勇武寧願被拉都唔肯走，因為仲有班傷者走唔甩呀！你班廢老日日只將指點江山當消遣、將年輕人當作可以任你擺佈嘅棋子，咪會覺得前線勇武鍾意留就留、走就走囉！

4. 其實一直去到晚上8點15分為止，理大仍然係有路可走。甚至乎去到8點，已有大量First Aid撤出，可以視為一個全面撤退嘅訊號，而亦都有以百計嘅同學把握呢個最後機會離開。前線勇武唔肯走，好多都係為咗響紅磡橋果邊吸住警方注意力，Buy Time比後方走──佢地唔走係有各式各樣嘅實際考慮；而就算退一萬步，就當佢地on9，我亦絕對明白佢地諗法：理大本身就係佢地要守護嘅家園，點解要走？匿響冷氣房嘅你地有資格笑佢地咩？

你班撚樣最撚叻咪就係響網上搞埋啲宗教式怪力亂神、將啲幼稚無知嘅國際分析包裝到好似絕世好橋咁，然後最叻就係叫人唔好做呢樣唔好做果樣，最後人地贏咗呢班SmartAss就順理成章做Free Rider，人地輸咗就撲出黎抽水講乜撚嘢「我一早知係局」、「守城果班正死蠢」，只能夠講全部都係最典型嘅香港式人渣。

三、理大之戰最大誤算係乜？

理大之戰迎來災難性結果，當然係有判斷失誤嘅地方。首先就係高估咗群眾嘅支持：大家都以為理大係可以好似中大之戰咁凝聚倒以萬計嘅市民參與同支援，但現實卻只係得幾份一規模。究竟係因為理大人欠缺中大人果種歸屬感、理大近市區太易散、定係中大之戰後期嘅潰散令到有人心灰而冷定點？呢樣都值得檢討。

至於另一個失算則係太多人依循過往嘅抗爭經驗，以為警方都會一如以往圍城缺一，而低估咗警方今次甕中捉鼈、關門打狗嘅決心。有好多理大校園入面嘅同學唔係唔想走，但當佢想走果刻卻發現係走唔倒；掉番轉有心支援理大嘅市民同外圍抗爭者亦太大安旨意，諗住去到危急關頭先出手，結果去到夜晚10點左右，因為有人吹大雞之下終於有大量救援車龍出現，但果陣警方已完成包圍網，郁手亦郁得太遲。

你要批評抗爭者有誤算，當然可以，但你班冷氣軍師，又有無去前線，那怕睇下實際情況係點呢？我從來都講，冷氣軍師最大嘅問題從來不在於冷氣，而在於錯。
由手機版發出