曼聯躉紅魔鬼地帶[VOL.97] ~CLOSED~

[Busconcamp]

2020/21 歐霸盃32強次回合 - 曼聯 VS 皇家蘇斯達
全場完，曼聯0:0皇家蘇斯達

上回合贏4比0結果蘇帥依舊將般奴放入正選陣容...2分鐘馬斯亞試圖推過數名防守球員後射門但射中人彈走，10分鐘般奴跑至門前接應拜利從後大腳傳球抽射被門將接實，11分鐘占士係禁區防守時侵犯對方球員，導致皇家蘇斯達獲得十二碼，不過對手射斜出界浪費追回一球嘅機會。14分鐘對手又於禁區邊位置起腳高出，其後連迪路夫用腳鏟走對方傳中球瓦解攻勢，15分鐘輪到拜利抄走對手左路傳中球，23分鐘般奴接應費特落底線傳球後撞射可惜射中楣彈出。曼聯係中段時間出現連番攻勢，但未夠威脅及不時被對方中堅解圍，35分鐘占士跑前接應般奴傳球以頭鎚攻門可惜被門將救到，完半場，值得一提係有拜利嘅後防真係較穩。

下半場曼聯換入杜安沙比、威廉斯及福仔，福仔更係接過隊長一職。47分鐘福仔主射罰球但射斜僅僅出界，49分鐘威廉斯侵犯對手被球證吹罰領黃，51分鐘格連活特推至中間遠射但被門將救到，隨後55分鐘格連活特再係右路突破於門前射門不過射中網邊出界，58分鐘曼聯換入迪亞奴。近期被譽為「黑腳」及「黑仔王」嘅杜安沙比於62分鐘本來接應泰利斯開出嘅角球，以頭鎚攻門破網取得入球，慶祝之際球證經VAR後指連迪路夫跳起後用膝頭頂中對方球員頭部犯規在先，所以判入球無效，相信各位都係第一次見到連迪路夫跳得咁高...尾段時間再換入梳泰亞，直到完場雙方再無入球記錄，結果曼聯兩回合計贏4比0晉級。