Default Style 註冊帳號
Games Animation Forum

顯示所有圖片
~清談館~>[年度35/05專區] 閘門內外都牽涉太多政治 屋苑密碼遭河蟹
david 11:40 AM 05-15-18
作者: :
臨近六四,有啲人似乎對某啲數字特別敏感,就連密碼都唔放過?「沙田區 Sha Tin District」fb專頁上載一張大圍居屋美城苑日前嘅通告,通告由美城苑客戶服務處致美城苑各住戶,註明「承美城苑業主立案法團指示發出此通告」,指收到暉城閣個別住戶投訴不滿新密碼設定為「8964」,「認為管理處設定之密碼有政治敏感之嫌」,客服處特此澄清,「原意實非如投訴人所述」,為免造成誤會同「不和諧」,已經更新密碼。

網上同時流傳一封估計係通告所指嘅投訴電郵,電郵提及美城苑暉城閣密碼為8964,令人聯想起「89民運64連(運)動」,認為管理處主動對政治立場表態。文中又提到另一座住宅大閘密碼為「1997」,認為代表中國(香港)回歸,促請管理公司避免遭受政治感染,亦唔排除透過區議員董健莉同民建聯葛珮帆跟進涉及政治宣示嘅行為喎。

相關通告惹起網民熱議,有網民質疑部份人心中有鬼;另有網民直言,「諗起都血腥同恐怖,不想記起,不能忘記」,但又有網民多謝呢張通告,因為好多90後原本都唔知道「8964」點解。

住戶:建制起風浪做法無聊

網民剝花生,居民又點睇?八方實地問過唔少街坊,好多人都話無問題,住戶方小姐話,相信密碼係隨機組成,認為「8964」無問題,但亦指管理公司做法可以接受,唔使堅持要或者唔要個數字。盧先生相信事件源於建制同民主派搶位爭選票,指建制派起風浪做法無聊。而八方同事採訪時被保安驅趕,對方聲言:「你影我相,我打爛你部相機」,嘩,使唔使咁惡呀?

民建聯區議員董健莉回覆時話有收到住戶投訴密碼有政治意味,「我就無話有咁重嘅感覺,始終都係一組數字,不論8964定1997都只係一組數字,唔覺得有太大政治問題」,並指收到住戶投訴後,管理公司翌日已經跟進。

Image
呢個都算係幾有新意O既頭炮:-)
回覆
真!DC 12:57 PM 05-15-18
Image
誠哥都作反了!
回覆
J+1 01:16 PM 05-15-18
低端屋苑就係低端屋苑,換晒拍卡系統就唔駛煩:-)
由手機版發出
回覆
david 02:35 PM 05-15-18
作者: J+1:
低端屋苑就係低端屋苑,換晒拍卡系統就唔駛煩:-)
由手機版發出
我老媽都係居屋,無記錯應該八九年前左右就有得拍卡,仲記得我每年只留港一個月左右,我同老媽要去管業處填份表先可以攞多張卡俾我...:-)
回覆
HON HON 07:56 PM 05-15-18
古有文字獄, 今有數字獄...
回覆
Ginji 08:05 PM 05-15-18
其實咁樣公布大廈密碼有無問題呢:-)
回覆
十一月 08:39 PM 05-15-18
其實都幾無聊
而且咁樣把人地大廈的密碼公開,人地真係多得你唔少....
回覆
david 07:15 AM 05-16-18
作者: Ginji:
其實咁樣公布大廈密碼有無問題呢:-)
你覺得俾支共完美洗腦O既東東會得閒理呢O的濕碎O野?:-)

另外,根據報導,原本堆密碼已經被河蟹改Q曬。
回覆
HON HON 12:57 PM 05-16-18
作者: 十一月:
其實都幾無聊
而且咁樣把人地大廈的密碼公開,人地真係多得你唔少....
密碼... D人多都唔記住既, 靠晒個食蕉開門, 所以公唔公開有咩所謂.
回覆


返回主題版面