[成龍]CHINA HKA 歡迎光臨終極優惠 ！！！！！！！

[歌絲˙暮斯]

頻傳財困 海航錢債「機票」償

海航集團今年頻傳出財困，資產賣得就賣，但仍然欠落成街數。海航旗下嘅金融平台前海航交所，居然諗到錢債「票」償，上月提出以機票現金券形式，向投資者償還欠款，近至北京，遠至美國加州嘅機票都可以兌換。但搭咩機，梗係得海航旗下嘅航空公司畀你揀啦！

根據方案，投資者每5000元人民幣本金欠款，就可以兌換一套現金券，每張券價值介乎500至3000人仔，可用嚟買海航旗下海南航空，或是大新華航空嘅機票，國內外航線都適用，例如500元人民幣可買北京飛往上海的經濟艙機票；3000元人民幣可支付由北京到洛杉磯嘅經濟艙機票。不過，兌換期得5年，由於買得呢類產品嘅投資者，閒閒地都投資咗過十萬，究竟要搭幾多轉機先回到本，就天曉得啦！

呢間前海航交所，成立4年，專向中國散戶出售高息理財產品，將籌集得到嘅資金，再借畀航空公司及航運公司，達數十億元人民幣。不過，今年初產品陸續到期，航交所未能按時償還本金及利息，有投資者今年8月到海航總部抗議，據聞投資者可能要等最多兩年先可以拎返本金。

查實中國公司真係好興呢套，先排有隻豬肉股就以公司生產嘅火腿，償還欠債利息，真正嘅錢債「肉」償。