[Kinny Riddle]

主角新太因睇唔過眼職場政治嘅黑暗而憤而辭職，但亦因為咁淪為半尼特族，只能靠做兼職維生。企業文化嘅黑暗嘅描述同因為失業太耐而要同朋友隱瞞冇工開嗰種尷尬都算好有共鳴。

新太有日被邀請參加一項實驗，學柯南咁樣返老還童重返高中以協助佢重建自信。如果成功，就可以被推薦去企業重新工作，但一切視乎主角點樣選擇對待呢個「新生活」。而且一年實驗完結後，學校所有人記憶將會刪除，唔會有主角嘅記憶。

估佢唔到。超級劇透－請務必睇到最後先入嚟

1。杏原來係實驗室輔助課職員。難怪會「咁啱」同主角一樣係轉校生，而且仲要「咁啱」佢同新太一樣所有測驗唔合格需要重考，以「一齊溫書」為名黐埋新太度。不過佢都係出於好心想幫新太先黐得咁埋，同前輩夜明觀察手法稍為唔同。

2。被驗者001原來就係日代。 （即環繞主角7個人當中只有3個係真。高中生，其他4個都係大人。）
其實之前都已經有好多提示：
－夜明話曾經喺之前喺學校「實習」一年，其實佢當時係觀察緊001進展。
－夜明喺報告話001社交能力有限，而日代亦係社交能力不足
－夜明同日代已經相識，並去到直呼名字嘅程度
－班上點解會有夜明同杏兩個觀察員，明明夜明一個觀察主角已經都夠。

不過，點解001日代身為去年嘅被驗者，實驗最終失敗，但今年仍然可以以高中生身份生活落去？
我估夜明應該係出於未能幫到日代嘅內疚，而向實驗室上頭求情比日代實驗延長多一年，而今年就加入社交能力高好多嘅新太嚟協助日代互相建立自信，務求一石二鳥令兩人實驗成功。杏就被安排做日代嘅觀察員。