玩野定堅架燦神......
-----------------------------
【無綫霸權】用版權阻「乜太」重現江湖 燦神變陣：我係七太
（攝影:陳俊強）(蘋果日報)
燦神廖偉雄嘅《燦神回歸乜太重出江湖救地球》下年一月喺九展開騷，今日燦神以乜太造型出席記者會，
之後燦神就乜太上身受訪，問到佢個騷嘅構思？佢話:「我冇構思，係個死人卓(黎文卓)叫我嚟，我哋尊重版權，呢個世界原創嘅人都畀人話唔係原創，依家人物係阿燦同阿卓諗出嚟o架嘛。」
台上佢哋演出趣劇，原來無綫打俾黎文卓，話因為版權問題，唔俾佢哋以「乜太」造型開騷，問到乜太幾時收到通知？佢話:「你哋頭先見到咪啱啱打電話嚟囉，之前仲傾得好好地o架。」咁有冇傾錢方面？佢話:「畀錢佢都唔肯呀，你以為我哋冇錢咩。」覺得覺得無綫好霸道？佢話:「唔會，可能佢哋想我哋自己發奮努力，我哋一定會做好佢，睇吓佢哋支唔支持，嚟唔嚟做囉。」
「乜太」繼續話:﹕「通過呢件先覺得有危就有機，機會唔係喺一個電視台出現，而係喺全世界電視台出現，好重要一樣嘢係人才流失(乜太)。」
講到TVB維穩，係咪因為怕乜太倒抽一涼氣，影射特首夫人？乜太反問:「你幾多歲？我廿五年前都做緊啦，今日先嚟倒抽咩，我抽你呀。」佢繼續話:「可能政策唔同咗，好好哋一個大台，我哋會支持嘅，睇吓佢哋支唔支持我哋啦。」
係咪因為接受過壹傳媒訪問？乜太話:「我成個訪問都冇講我係邊個喎，佢哋自己寫，叫佢哋小心畀人告添，我冇事o架。」咁係咪一早知呢件事？佢話:「你哋呢啲要問番死人卓，我只係坐陣，乜都唔知。」咁有冇神秘嘉賓？乜太話:「到時邊個鍾意上嚟就邊個上，燦神回歸，當然燦神先係主角。」
問燦神之前係咪切除腎石？佢就講出經驗之談:「以後大家腎石唔痛唔好去睇，痛先好去睇，原來左一粒，右一粒，右攞出嚟，左一粒插入喉又做唔到。」問到個騷會表演啲乜？阿燦話會喺騷入面彈琴，佢本身唔識，但有心做件事就得。
咁個騷係咪會講政治？佢話:「笑聲救地球，想將歡樂帶大家，不談政治，咩咩...唔係笑聲救地球呀，係我七太呀。」
