祖記又諗縮數 想平借A山拍C朗
專門搵免轉會費球員嘅祖雲達斯又出手，今次目標係曼聯智利前鋒阿歷斯山齊士，A山同曼聯仲有3年約，當然冇得平簽，但就可以借住先，因為消息指曼聯打算今夏清洗呢位廢將，由於身價太高出售機會不大，最可能將佢外借，祖記睇中呢點，諗住搵着數。
A山喺曼聯嘅基本周薪係35萬鎊，再加埋獎金同肖像權，周薪高達50萬鎊，咁嘅人工但表現差劣，真係搵鬼要，亦因為咁，A山有好大議價空間，曼聯將佢外借用意係減少損失，消息指祖記方面提出兩個方案，一就係A山肯自降人工，二就係曼聯負責部份人工開支。
其實祖記本身都有吸引力，A山過檔嘅話可以拍住球王C朗，話唔定可以鹹魚翻生，所以唔係冇得諗架。
