平時對黑妹冇乜反應，但王妹Shuri真係幾索吓。
如果T'Challa最後成為妹控，我唔會覺得奇怪。
最近MCU好鍾意嚟泡菜國拍外景，遲下會唔會好似A1咁大家片尾去韓國餐廳食泡菜？XD
釜山嘅追車場面可能係自Civil War以來最好睇嘅非CG動作。（唔係話冇CG，但最多都只係輔導）
獨臂軍火佬Klaue （同Klaw爪臂諧音，所以先有咁先進嘅義肢電磁炮）明明喺漫畫原作先至係黑豹嘅大反派，結果變成好似Iron Man 3嘅Mandarin咁用完即棄。
Ross特工喺原作只係一個經常協助黑豹嘅普通外交官，不過為咗劇情需要點都要將設定改為前空軍機師嘅CIA特工俾佢大展身手。繼Sherlock飾演Doctor Strange，而家連Sherlock嘅華生醫生都現身MCU（之前喺Civil War已經短暫登場過），兩個英國演員用美國口音講嘢始終感覺奇怪。唔知佢哋兩個會唔會喺Infinity War碰頭？
既然Killmonger係為殺父之仇而嚟搵T'Challa算帳奪權，我仲諗住T'Challa會用返佢係Civil War差啲被仇恨沖昏頭腦嘅過來人經驗嚟勸Killmonger收手。（雖然Killmonger唔會聽得入耳就是，但起碼叫做有多啲MCU嘅連貫性）
聯合國嗰幕有個國家代表不識抬舉話Wakanda身為「農業第三國家」可以分享到啲乜嘢俾全世界。與其即場展示Wakanda嘅高科技，編劇選擇俾T'Challa佢哋笑而不語然後完結呢幕。我比較喜歡呢個一切盡在不言中嘅演出，無需要乜都畫公仔畫出腸。
雖然Infinity War trailer已經知道Bucky會復出，但見到佢客串都算係唔錯嘅彩蛋。
到最後都仍然冇公開最後一粒無限寶石－靈魂寶石－嘅下落，不過從汎合金隕石呢個外太空物體可以隱約估到靈魂寶石就係喺Wakanda境內。再加上食落由隕石所培育嘅心型藥草可以與亡魂溝通呢點亦非常接近靈魂寶石嘅特徵。IW trailer Thanos大軍大戰黑豹與Bucky領導嘅Wakanda軍隊更加毋庸置疑最後粒寶石嘅確實位置。
