[肉羊哩咖]

另一部追完嘅係 The Boys 第一季。由 Sony TV 有份製作，每話一粒鐘全八話。

講美帝有班有特殊能力嘅超級英雄(戲入面通稱 Supe ），現役嘅都有成三百幾件，全部由一間私家企業/明星公司管理，表面上班英雄係保護（美國）人，除暴安良，實際係為咗間公司，靠形象賣包裝，拍廣告拍電影賣週邊搵錢搏出名。表面上偉光正，但幾乎件件私生活亂嚟，甚至做嘢唔負責任，但人類渴求被救贖嘅心態太強，更何況無人同政府，敢得罪班一個手指尾都化你灰嘅超英，同後面有財有勢嘅大企業，咩「有大能力就要負大責任」呢度完全唔啱聽，有咩衰嘢全部掃晒入地毯底，冚住唔畀人知，或者用蚊年攪掂。

故事係由一個靚仔因為超英任性事件開始，另一條線係搵男主角幫手，勁憎 Supe 嘅神秘男子 Butcher，同佢班拍檔，點去搵班 Supe 尋仇，第三條係講純真新人 Starlight，初出道就被選入去最負盛名嘅超英組 — 「七人」（The Seven）嘅經歷；第四條係講最強 Supe The Homelander，一個超人同美國隊長嘅混合體嘅故仔，最後係間企業個野心同糗史，呢幾條線交織而成。好似好多嘢發生，但故仔極濃縮，無乜空白悶位，節奏掌握，情節分配都好好。

你鐘意睇超英片絕對唔可以錯過，佢玩同諷刺同好多超英老梗，甚至比 The Watchman 同 Brightburn 更現代咁去「解構」；開頭講凡人點殺一個唔知有咩弱點嘅超英，已經好吸引，仲玩智謀同心理戰；男主角同 Starlight 呢個「人神戀」係好老梗，但睇得幾舒服；反而第二主角 Butcher — Karl Urban 飾演（星空奇遇，雷神3）好搶鏡，佢背後個故仔穿晒成季；有成話係拎美國班「政教合一」友嚟玩，對呢味敏感嘅留意。動作就唔平均，有啲打鬥幾精彩，有啲跳嚟跳去唔知點，但整體都收貨嘅。而特技都算幾好，唔係電影級數，但好過好多 CW 同 DC Universe 上面播嗰堆。

留咗好多條尾去下一季，而傳已經開咗鏡，期待。想睇 trailer 去樓上搵喇～