【賽後解碼】盧卡古堅翻生 幾時先到A山
英超今晨打完嘅曼聯主場對修咸頓大戰,「紅魔鬼」喺一度落後,以至反超再被追平,憑住全場梅開二度嘅盧卡古,喺完場前1分鐘禁區邊快腳入靚波,最終戲劇性險勝3比2,全取3分,仲趁住阿仙奴同晚作客熱刺失分,得以攀上第4位。
修咸頓今場打到26分鐘,憑住恩華利尼一記遠程重炮射入領先。曼聯打到下半場8分鐘憑難得擔正嘅安達斯彭利拿離門30碼一記世界波扳平。之後就輪到近期趁住傷兵多多,得以重返正選行列嘅盧卡古發威,佢先喺59分鐘禁區左路離門12碼右腳射遠柱入網,助「紅魔鬼」反超前2比1。
修咸頓喺75分鐘再有禾特普斯射入世界波罰球,扳平2比2。不過今場波堅精彩,去到89分鐘,盧卡古禁區邊轉身又係右腳快腳射死角,曼聯以3比2再次取得領先。補時階段,「紅魔鬼」幾乎仲可以拉開紀錄,只係拉舒福特禁區內被侵犯博得12碼,保羅普巴操刀一射被救出,曼聯終以3比2險勝。
值得一提,季初畀人鬧爆嘅盧卡古,近排因為多位前鋒受傷,突然重返正選,即刻連續兩場梅開二度。始終呢位比利時射手射術唔曳,又有強大衝刺力,只要繼續同「福仔」練好默契,改善埋對強隊腳軟毛病,一定會係曼聯未來爭取佳績重要棋子。反而今場同樣正選上陣嘅「山神」阿歷斯山齊士,今場又係冇乜貨交,最後仲要傷出埋,唔知幾時先等到佢返嚟呢?