[肉羊哩咖]

冴羽個款幾似，嫌佢古肅得滯，有動漫版個嘻皮笑臉樣，會好返啲；而惠香又少咗啲男人味～（逃）

The Gentlemen，同 Guy Richie 三年前（？）套同名電影無直接關係，人物處境全新，同嘅就係有人用英國貴族啲大宅嚟「種嘢」，亦有啲佢另一套名作 Snatch 嘅原素炒埋一碟。故仔由貴族嗰邊講起，男主角因為老豆突然去世，繼承咗佢個「家族生意」而開始。演員大部份唔識，但係男女主角入晒型格，尤其女主啲打扮好掂，其他角式都好出，尤其係「西洋堅叔」Giancarlo Esposito 搶到無朋友；大部份對家造型係爭啲，好在唔似電影版咁，全部得個惡字而無腦，啲對家係惡係貪，但唔係就咁任人擺布；反而負責「搞笑」嗰兩位，男主角個大哥同「技師」，本人覺得佢哋煩，除咗用佢哋「搞出事」推展劇情之外，又唔覺得佢哋有幾好囉。

加埋因為級數關係，好多出入高級場所嘅場口，靚人靚杉，唔係 Snatch 咁溶溶爛爛（唔係話 Snatch 唔好睇），個製作費貴唔貴就唔知，視覺享受絕對無問題。故仔就快得嚟唔趕，亦唔會拖，仲要有齊 Guy Richie 啲招牌扭橋，計中計，同跳嚟講啲手法，加埋佢啲剪接手法，同埋機關鎗式對白，真係好耐無煲劇煲得咁爽快；又用大量隱喻同英國悝語，絕對幾考觀眾下，好在唔會好似 Chritopher Nolan 啲咁深澀，又無當啲觀眾係傻仔。

如果一心想睇打嘅就爭啲，話話都有但係少咗啲，因為男主角個出身，有說服力，好在啲暴力同精彩程度，比電影絕對有過之而無不及，睇得幾痛快。全季 8 話，齊齊整整，結尾留白嘅地方唔多，但係要開第二季都應該得掛。

開咗隔籬台個《將軍》，轉陣地再講。