[kev00269270]

作者: Kinny Riddle

想當年梁耀忠李卓人拆開兩張名單，票源相同，但由於兩人屬唔同派系，所以無話咩協調唔協調。當時大家都以為兩人會攬炒。但由於佢哋冇就走去互相攻擊，而係兩人矛頭都係直指土共，結果當年投票率創新高，兩人都雙雙入到去。之後多得李梁兩人，無論泛民定土共先察覺到呢個遊戲嘅真正玩法。

不過最近大家開始太過沉迷「分拆名單，各行各路」，只管為自己山頭名單爭取最大支持，而忘記咗「推高投票率」先至係防攬炒嘅道理。

想拆開名單而完美地配到票，只有毫無自由意志嘅土共鐵票先可以做得到。擁有自由意志嘅人根本冇可能同佢比。因為非建制派最大弱點反而就係佢哋太多自由意志，性格差別太大。

以商場鋪頭（非建制派）做例子，如果同一層（例如本土派）有兩檔都係賣麵包（邊兩個唔使我講啦？）。如果一間走去派人唱衰另一間或公然搗亂，除咗死忠粉絲之外，呢種行為只會趕客令商場人流大幅減少。相反兩邊良性競爭，客人因為兩邊都有「優質」（因人而異）嘅選擇而多咗入嚟幫襯兩邊，商場（非建制陣營）亦因此可以受惠。

講左一大堆廢話唔好意思。因為以香港人性格，根本冇可能會高投票率，亦無可能會聽得入我以上嘅說話（因為大家自我意識太強大）。我可以做嘅係每星期推出啲所謂配票建議比大家參考吓。之後一切隨緣，香港選舉隨時變得比馬來西亞更黑暗。

一開始有架
飯民個口號係"決戰689"
本來係想推高投票率

But,你有幾耐冇聽過依句?
選舉論壇聽過幾次有人問支唔支持689連任?
林榮基係邊個?周永勤發生乜事?
本來一堆可以推高投票率既議題,你聽過幾多?

多得你班人內鬥100%外鬥0%
689係度偷笑啦