佢係曼聯新7號！
16歲艾米恩斯天才新星艾美蘭喺Instagram有圖有真相自爆，已經完成轉會正式加盟曼聯，但最離奇係，佢得到印住自己個名嘅紅魔7號波衫簽約，搞到有網民問，阿歷斯山齊士係咪確定要離隊收擋喎！
艾美蘭最佳位置係翼鋒，踢法有啲似曼城嘅利萊辛尼，佢本身係法國U16成員，比利時國家隊都想嗌佢過檔加入，而且祖雲達斯同巴黎聖日耳門都想搶人，最後佢決定去奧脫福，搞到有網民話，如果佢真係掂，不妨直接上一隊取代山神。
另外，有網友好抵死咁話：「有冇人話畀山齊士知，佢冇咗件7號波衫？」雖然好多曼迷希望，艾美蘭勁到可以代替山神，但之前有消息話，其實紅魔打算將佢借返番畀艾米恩斯，等佢有更多機會磨練，或者球迷要畀多啲時間佢爭取上位呀！
