《 零入球就是廢？為傳統高大中鋒的平反 - 基奧特》
基奧特，身為法國國家隊既正選前鋒，如果你單睇佢喺今屆世界盃既數據，可以話絕對唔合格，由分組賽至今六場波，交出既就只係零入球一助攻，射波無腳準，就算中龍都係有力度無角度，你可以笑佢廢，可以笑佢碌碌無為，
但基奧特對於依隊法國隊有幾重要，你又睇唔睇得出？
三十有一，年紀上開始進入球員既黃昏期，
如無意外四年後既法國隊大軍名單亦唔會有佢喺度，意味住今屆將會係最後一屆。身處於平均年齡相對低既法國隊，基奧特好清楚自己喺隊中既位置，速度佢唔會夠班後生仔跑得快，靈活度亦唔會有佢地咁敏捷，既然係咁，就唯有專一地去做一個「綠葉」柱躉中鋒。
不惜犧牲體力由前線走到後場幫忙防守，不惜犧牲前鋒的入球數字為隊友開山劈石頂波開路，不惜犧牲去做一個起腳機會比隊友少的法國9號，透過走動不斷竄擾、牽制對方後衛，拉出更多空間比隊友突破製造進攻機會，己隊開出龍門球時能夠作支點爭頂，多次成功停波並二傳比隊友，聽落好簡單既野，但又有幾多個前鋒做到又或者肯做哩啲野？
基奧特沒有基沙文在馬體會拍檔迪亞高哥斯達既前線全能性，沒有麥巴比在巴黎聖日門拍檔卡雲尼既埋門把握力，亦沒有丹比利在巴塞拍檔蘇亞雷斯對入球的渴望，
但基奧特話比全世界聽，唔需要多產量，唔需要世界級，唔需要比較，做返一啲簡單野一樣可以成功，基奧特就係基奧特，基奧特就係「銀河唯一」。
為傳統既柱躉中鋒、高大中鋒，實實在在地作一次有力的平反！
文章最後更新時間 : 14/07/2018 12:30
Fanpiece - 藍獅:
http://football.fanpiece.com/bluexli...-c1324655.html
