《地鐵車廂讓座，簡直係一場心理攻防戰》
是咁的，好多人認為讓座係一件好簡單嘅事，但我唔認同，由其是係香港。
讓座根本就係一門艱深嘅學問，如果有人出版一本書叫《甚麼時候應該讓座》的話，唔需要問法官大人，我會即刻拎去收銀處。
講真，作為一個廿多歲的男性，係讓座依個item上面，我地簡直係首當其衝上戰場。好似清兵咁，掛過勇字就行出去接受世人嘅批鬥。
我曾經從金鐘坐上一班通往柴灣的地鐵。幸運地我竟然有位坐，但尾隨上車嘅係一個老婆婆。
一個擠逼嘅車箱、一個有位坐嘅年輕人、加上一個無位坐嘅老人家，簡單就係一件連環不幸事件。
一場車程頓然變得不簡單，所有旁人都好似變左鄭子誠一樣，都有陰謀。
你知道，你明白，你已經進入咗香港式嘅讓座遊戲。
老人家應該要有位坐，不過就睇下由邊個讓啦。一排座位六張空櫈，你係時候要思考一個問題－「邊個讓先啱？」
香港這地方很有趣，我們不介意讓座，但最怕讓錯座。雖然近年有咗優先座，但好不幸地所有人都喜歡迴避這個優先座。
其實你懂的，優先座於香港人而言，是告訴屁股的主人：「坐得優先座，有咩事，你就要係第一個讓座。」
只要自己唔係坐係優先座，面對100個大肚婆都可能會認為「讓座？咪優先座個班讓先囉！」
係香港，優先座原意係鼓勵大家讓座，到最後，優先座變成一個香港人唔讓座嘅理由。
所以我寧願企都唔坐優先座，大佬真係好大壓力，你企起到可以自閉下，你坐係優先座簡直係寢食不安，司機就顧住成車人條命，你就要顧住成車人有無位坐。
稍一不留神，讓遲咗你已經可以打電話比媽媽叫佢避一避，因為暗地裡你已經比成車人問侯到2046。
一陣行咗個五十幾歲，滿頭白髮得黎又精神奕奕嘅伯伯，讓又驚「表錯七日情」，唔讓又驚比人話係「沉默的羔羊」。
一陣有個肥女人入黎，你甚至要用五至十分鐘思考佢係太肥定係有咗身孕。
成件事已經超愈Phy、Chem、Bio，大壓力過DSE。
咁講返個程地鐵，我就醒水，當然睇下優先座個兩個人會唔會讓座先啦。其中一個耷低個頭，成部Eva初號機一樣，完全沉默。
另一個好啲，不過個頭長期擰向右邊，可能覺得自己側面靚女啲啦，我諗佢唔係想扮見唔到嘅。
件事發展到依個地步，真係「事已至此，誰會最易」，
我個一刻都知讓座捨我其誰！
立時頭也不回，心諗要教導其他人，「即使不是優先座，也有讓座義務」的硬道理！
「婆婆，你坐啦。」我露出潔白嘅牙齒，自信嘅笑容，我隱約感受到身邊嘅人為我痴狂。
「多謝你，不過唔洗啦。我好快就到。」
比起係「求愛大作戰」入面被港女請食檸檬，我認為阿婆依一句更令人難之忘懷，極為重擊！就好似街機拳皇入面八神「爆珠」醒一招「八酒杯」過我，Combo100hits，好自然地，你會聽到一聲。
「K.O.！」
婆婆拒絕了我的讓座。
個一刻，心情真係好難堪，我差啲就喊出黎，因為我已經Feel到隔離左右啲人個嘴已經開始向上彎，我唯有硬住頭皮同婆婆講：「不...不如..你坐啦,,,我都起咗身...」
「唔洗，有心。」聽到這句，我已經成為「柒牌男裝」嘅香港區星級代言人。
讓座讓到比人拒絕，仲要連環兩次，玩到咁大都算突破。
我一坐返底，已經有人「吱」一聲笑咗出黎，原先沉默嘅初號機先生已經差足電，望住我，佢皮笑肉不笑，即係忍梗笑啦...
其他人，都向我投向奇異的目光。
我一直無抬起頭，心裡面流住時代的眼淚。
其實香港人，某程度都喜歡睇人「X街」，睇人失敗。每次見人讓座，總有部份人心諗：「如果人地唔坐就好笑啦。」
不過講到尾，我依然相信好多人都肯讓座、只係怕讓錯咗會難為情，我們這一代的確有啲「衰唔起」，面皮簿。唔係唔讓，只係唔敢讓。
外國會否同樣不得而知，只是香港人對待「讓座」這回事的思想就的確複雜過頭，過份算計。但近年見多咗人關心「讓座文化」，也許會逐漸好轉。
只是於地鐵車廂中，看見這張長期空空如也的優先座，
它的微笑，其實很悲哀。
